"دي مش معاملة أساطير".. مجدي عبدالغني معلقًا على أزمة دخوله مباراة مصر والسنغال

قال الكابتن مجدي عبد الغني، لاعب منتخب مصر السابق، إن الفيديو المتداول عن أزمة دخوله استاد القاهرة في مباراة مصر والسنغال أمس الجمعة مجتزأ للواقعة وما ظهر خلاله جاء بعد ساعة من العطلة.

وأضاف عبد الغني، خلال مداخلة هاتفية مع الإعلامي أحمد موسى ببرنامج "على مسؤوليتي"، مساء السبت، أنه حضر إلى الاستاد بدعوة VIP وتصريح دخول سيارة، وعندما وصل إلى البوابة فوجئ بتعنت كبير جدًا، متابعًا: "في الطبيعي عمري ما رحت الاستاد ومدخلتش بعربيتي حتى لو مش معايا تصريح، وموظفين الاستاد كلهم عارفيني".

واستطرد عبد الغني: "أنا عامل عملية في المفصل ومقدرش أمشي لمسافة كبيرة، ولو كان في حاجة توصلني كنت ركبتها وسيبت عربيتي.. ولو كنت أقدر أمشي كنت مشيت ودخلت الاستاد على رجلي، ولو كان ينفع الحق اتفرج على الماتش في البيت كنت رجعت".

وتابع لاعب منتخب مصر السابق الذي حضر إلى الاستاد ضمن دعوة "أساطير المنتخب": "فضلت متعطل ساعة في العربية قبل اللي ظهر بالفيديو، وقعدت أنادي على المسؤولين وكأني في صحراء.. دي مش معاملة أساطير المنتخب".

وأضاف: "لم أتطاول على فرد الأمن اللي ظهر بالفيديو بأي ألفاظ أو سباب، وأنا عارف إني مش بإيده حاجة، والشاب مالوش دعوة بالموضوع وأنا أحترمه وأقدره، فأنا لم أتعدى عليه لكن فتحت الحاجز.. وسيد عبد الحفيظ وربيع ياسين وحازم إمام وغيرهم كانوا متعطلين ورايا".

واستطرد عبد الغني: "كل اللي قلته أنتم مش جايبنا عشان نتهزق، ولو مش معايا دعوة كنت قعد اتفرجت في البيت.. أنا روحت فتحت الحاجز ورجعت للعربية عشان أدخل.. أنا مش صغير وتخطيت 60 سنة.. كل ما نكبر نتقدر ولا نتبهدل؟".

وانتهى عبد الغني، قائلًا: "أنا وراء المنتخب بروحي ودمي.. هو الجون بتاعي ملوش أي قيمة ولا إيه يا جماعة".