الفشار والحاجة الساقعة.. ياسمين عز توجه نصائح للزوجات خلال المونديال

وجهت الإعلامية ياسمين عز بعض النصائح لمتابعات برنامجها "كلام الناس" المذاع عبر قناة MBC مصر، اكدت على أهمية الانتباه للحالة النفسية الخاصة بالزوج أو الخطيب خلال فترة مباريات كأس العالم لكرة القدم، التي تنطلق خلال ساعات.

وقالت ياسمين عز خلال تقديمها حلقة اليوم إن كرة القدم ستكون ضرة الزوجة أو الخطيبة خلال شهر كأس العالم، ان الست الواعية هي اللي تعرف تتعامل مع ضرتها وتخرج من الشهر ده بأقل الخسائر وأكثر المكاسب.

نصائح ياسمين عز عن المونديال

وقالت ياسمين: " تخيلي إنك مسافرة ومشوفتيش أمك من 4 سنين، لهفتك على أمك هي نفس لهفة جوزك وهو منتظر ماتشات كأس العالم.. متحاوليش تقللي من شغفه، وكل شوية تقولي مالك ملهوف على الماتشات وسايبني، لإن وقتها هتسمعي رد مش هيعجبك.. حالة النظافة المفاجئة وتلميع الشاشة وتنظيف النجف وتشغيل المكنسة ملهاش لازمة وقت الماتشات".

وإضافت: "مع بداية الماتشات كل يوم الساعة 12 الظهر، جوزك يلاقي الفشار والحاجة الساقعة والريموت وكل حاجة متظبطة، أثر ده على نفسيته هينعكس عليكي بعد كده من فوائد شهر كأس العالم إنه بيعرفك قيمة جوزك، وإنت واقفة عند الكاشير في السوبر ماركت متنسيش تدعي لجوزك اللي سايبلك الفيزا، وعمره ما حسسك بغلاء الأسعار".

ياسمين عز: إتفرجي معاه وشجعي من غير مبالغة

واكملت ياسمين: "طول شهر كأس العالم بلاش الأسئلة اللي بتجيب تصلب شرايين للرجالة، وخاصة أعملك إيه على الغدا حتى لو مش بتحبي الكورة، حسسيه إنك بتشاركيه اهتماماته، أسأليه بتشجع منتخب إيه، وإتفرجي معاه وشجعي من غير مبالغة.. المخرجين في كأس العالم بيركزوا على البنات الحلوة في المدرجات، لو جوزك بص للشاشة وابتسم ده معناه إنه مبسوط بالحدث ككل، مش إنه معجب بالست اللي في المدرج".

واختتمت ياسمين عز: " لو قلت لجوزك اقفل عينك لم الكاميرا تيجي على بنت حلوة هيقفل منك..  الراجل قلبه واجعه على غياب منتخبنا عن كأس العالم، متبقيش إنت والزمن ومنتخب السنغال عليه آخر 5 دقايق من الماتش خليكي ناصحة، في الوقت ده أطلبي من جوزك أي حاجة، هو غالبا مش سامعك، ولو طلبت عينيه هيديهالك عشان يخلص".

والجدير بالذكر ان برنامج "كلام الناس" يعرض من الخميس إلى الاحد الساعة 6 مساء على قناة mbc مصر.