شهدت فعاليات الدورة الــ 12 من مهرجان الأقصر للسينما الأفرقية،ندوة تكريم الفنانة هالة صدقي ،وتحدثت عن العديد من الأسرار وتفاصيل مشوارها الفني وعن أهمية المسرح ورأيها في العروض المسرحية التي يتم تقديمها خلال الفترة الحالية.
قالت هالة صدقي خلال ندوتها: "أنا عاشقة للمسرح، وكان في عروض مسرحية كتير الفترة اللي فاتت، لكن ده مش مسرح، أنا شايفة إنهم بيروحوا يعملوا اسكتشات، وفي جمهور للفن والفنانين المصريين، فـ إحنا لازم يبقى عندنا شوية سيطرة وتنظيم للفرق المسرحية اللي بتسافر تعرض في البلاد العربية، لأن في الاخر دي شايلة اسم مصر"
وأضافت: "مهم أوي نركز على إحنا بنقدم إيه في المسرح، وحلو إننا نستغل فرصة إن في جمهور عايز مسرح وحابب يتفرج علينا، بس الأهم إحنا هنقدم له إيه، ولما نعمل عرض يتعرض يومين ويجيب قرشين بس ده بيقفلك السكة اللي بعد كدة".
وواصلت صدقي: "لازم تثبت وجودك وتثبت فنك، وميكونش التفكير المادي هو نمرة واحد عندك، وأنت بتعمل مسرح، وللأسف في حالة من الاستسهال والتساهل الشديد جدًا موجودة دلوقتي، والمسرحية بقت بتتعمل في 3 و4 أيام، معرفش إزاي ده بيحصل، دي حاجة بتسئ لينا".
سبب اعتذار هالة صدقي عن مسرحية للفنان محمد صبحي
كشفت هالة صدقي سبب اعتذارها عن المشاركة في مسرحية للفنان محمد صبحي، قائلة: " لما أعمل مسرحية لازم أعرضها شهر عشان المُشاهد ميحسش إني مش بحترم وقته وبقدم له سلعة مضروبة، ونفسي أرجع مسرح بس يكون مسرح صح، وبالنسبة لمسرحية أستاذ محمد صبحي كان سبب اعتذاري عنها أولًا إن كان عندي ارتباط، ثانيًا المسرحية كانت كلها كوميدي ودوري أنا بس اللي كان تراجيدي".
وتابعت:" قولت لـ محمد صبحي أنا كدة هبقى نقطة ضعف في المسرحية، طبعًا أنا هموت واشتغل معاه بس اضطريت أرفض، عشان الناس لما تلاقيني أنا وهو مع بعض على الأفيش هيكونوا مستنين يدخلوا يضحكوا، وهيلاقوني تراجيدي وده هيأذي المسرحية مش هيفيدها".
أبرز المكرمين في مهرجان الأقصر للسينما الأفريقية
يذكر أن كرم مهرجان الأقصر للسينما الأفريقية في دورته الـ 12، أمس، الفنانة هالة صدقي،و سلمها الفنان القدير محمود حميدة الرئيس الشرفي للمهرجان، درع التكريم أمام حضور وضيوف المهرجان.
تقام فعاليات المهرجان في الفترة من 4 إلى 9 فبراير الجاري، برئاسة السيناريست سيد فؤاد، وإدارة المخرجة عزة الحسيني، والرئاسة الشرفية للفنان محمود حميدة لهذه الدورة الجديدة.
وضم حفل الافتتاح، تكريم عدد من الفنانين والمبدعين الراحلين، وهم اسم الفنان صلاح منصور "بمناسبة مرور مائة عام على ميلاده" ويتسلم التكريم رئيس اتحاد النقابات الفنية المخرج عمر عبد العزيز، كما يتم تكريم اسم الفنان الممثل هشام رستم من تونس، ويتسلمها المخرج "يونس بن هجرية" المشارك بفيلم "الجترة"، وتكريم اسم الفنانة الجزائرية الراحلة شافية بودراع، ويتسلمها المخرج الجزائري أنيس جاد صاحب فيلم "الحياة ما بعد".
وفي ختام حفل الافتتاح تم تكريم كل من الفنانة هالة صدقي، والمنتج الموزمبيقي بيدرو بمينتا، والمخرج السنغالي منصور صورا واد، والموسيقار هشام نزيه، والفنان محمد رمضان.
ملحوظة: مضمون هذا الخبر تم كتابته بواسطة الفجر ولا يعبر عن وجهة نظر مصر اليوم وانما تم نقله بمحتواه كما هو من الفجر ونحن غير مسئولين عن محتوى الخبر والعهدة علي المصدر السابق ذكرة.
