فن / التحرير الإخبـاري

أمينة: «ماعملتش فلوس وباستلف من جوزي ونفسي أمثل مع الزعيم»

حققت الفنانة أمينة نجاحا كبيرا في الأغنية الشعبية، وكانت قد بدأت مشوارها الغنائي بالمصادفة، حين قامت بالغناء في إحدى المراكب السياحية، وسمعها الشاعر أحمد شتا وقدمها إلى المنتج طارق عبد الله، وقدمت أغنية "عودي الغزال"، وقامت بأداء أغنية "الحنطور" في فيلم "قصة الحي الشعبي" مع سعد الصغير عام 2006، والتي حققت نجاحا كبيرا.

كشفت المطربة الشعبية أمينة عن الكثير من أسرار حياتها الفنية والشخصية، خلال لقائها، اليوم، ببرنامج "هذا الصباح"، المذاع على "إكسترا نيوز"، وإليكم أبرز تصريحاتها..

1- باحب الحاجات البيئة

قالت الفنانة أمينة، إنها تحرص على الوجود دائمًا من خلال أعمالها، وذكرت: "حد قالي إني اخترعت حاجة جديدة في الأغنية الشعبية، خليت الفنانة شيك أوي وبتعمل حاجات جديدة، أنا باحب الحاجات البيئة، كلمات الأغنية الشعبية دارجة وفيه ناس بتقول على الكلمات بيئة، بس المهم إنها تتسمع والجمهور يحبها".

2- باستلف من جوزي فلوس 

وعن زوجها، قالت: "حد كويس وواقف جنبي جدًا ومقتنع بيا، لأنه عارف أنا تعبت إزاي، هو دايمًا يقوللي أنا شايفك أد الدنيا وعارف إنتي راجل إزاي، دايما بيديني ثقة في نفسي، هو بينتجلي لأني ماعيش فلوس وباستلف منه على طول، لأن شغلنا مش بيجيب كتير، واللي باخده مافيش".

واستكملت: "مازودتش أجري، وزي ما أنا في السوق من ساعة ما بدأت من أول ما كنت بـ2 جنيه، أنا وجوزي حبينا بعض سنين كتير، وعمري ما هانسى وقفته جانبي أبدا، ومارضيتش يتجوزني غير لما عملي فرح كبير".

3- أرفض ولادي يمثلوا دلوقتي

أوضحت أمينة أن لديها طفلين: "عيالي مش بيشوفوا غيري وجوزي دايما بيغير من ده، بافرح جدًا بيوم الأجازة لأني باقعد معاهم وبارفض أي حاجة تجيلي اليوم ده، يوسف كوميديان جدًا وحاسه إنه هيطلع موهوب وفنان".

وتابعت: "عمري ما اقبل إنهم يمثلوا وهما صغيرين، رغم أن يوسف الكبير شخصيته باينة بس مش عايزه يمثل دلوقتي خالص".

4- نفسي أمثل مع الزعيم

أكدت أمينة أنها تتمنى تقديم عمل مع الفنان عادل إمام: "ممكن أمثل بس من غير غناء لو مع الزعيم بس، دايمًا كان بيقوللي هتبقي كوميديانة كبيرة، بس أنا ماعنديش شلة عشان حد يجيبلي شغل كتير في السينما".

5- نفسي أطلع كل 3 دقايق في التليفزيون

وعن اختفائها الفترة الأخيرة، علقت: "نفسي أعمل كل حاجة وأطلع كل 3 دقائق في التليفزيون، وأعمل أفلام ومسلسلات وأغاني كتير، بس الأعمال اللي بتجيلي مابتبقاش مظبوطة، مش عايزة أطلع دور واحدة شعبية وخلاص عايزة أمثل بجد".

6- مابحبش الرمرمة

تأثرت أمينة بتذكر مدير أعمالها، خالد خليل، مؤكدة أنها تفتقده: "خالد أخويا وعشرة 18 سنة، استحملني كتير أوي وشفت معه النجاح والخير، هو كان وكيلي في كتب كتابي، وآخر فترة ليه كان في المستشفى وتعبان، بس موته فرق في حياتي كتير".

واستكملت:"ماكناش بنحب الرمرمة، هو خالد ومعايا مدير أعمال تاني سامح، وجوزي بس بناخد رأي بعض في الشغل وماحدش بيدخل في حاجة تاني".

ملحوظة: مضمون هذا الخبر تم كتابته بواسطة كتاب التحرير الإخبـاري ولا يعبر عن وجهة نظر مصر اليوم وانما تم نقله بمحتواه كما هو من التحرير الإخبـاري ونحن غير مسئولين عن محتوى الخبر والعهدة علي المصدر السابق ذكرة.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا